RCB vs KKR: கொல்கத்தா பேட்ஸ்மேன்களை கதறவிட்ட சிராஜ்… பெங்களூர் அணி மிரட்டல் வெற்றி!

ஐபிஎல் 13 ஆவது சீசனின் இன்றைய 39ஆவது லீக் போட்டியில், முகமது சிராஜ் 4 ஓவர்கள் வீசி இரண்டு மெய்டன்கள் மற்றும் 8 ரன்கள் மட்டும் விட்டுக்கொடுத்து 3 விக்கெட்களை கைப்பற்றி அசத்தினார். இதனால் ராயல் சேலஞ்சர்ஸ் பெங்களூர் 8 விக்கெட்கள் வித்தியாசத்தில் அபார வெற்றி பெற்றது.

அபுதாபியில் நடைபெற்ற இன்றைய போட்டியில் டாஸ் வென்ற கொல்கத்தா அணி முதலில் பேட்டிங் செய்தது. முதல் வரிசை பேட்ஸ்மேன்கள் ஷுப்மன் கில் (1), ராகுல் திரிபாதி (1), நிதிஷ் ராணா (0), டாம் பன்டன் (10) ஆகியோர் சொதப்பலான ஆட்டத்தை வெளிப்படுத்தி வந்த வேகத்தில் நடையைக் கட்டினர்.

தினேஷ் கார்த்திக் 14 பந்துகளில் 4 ரன்கள் எடுத்து வெளியேறினார். இயான் மோர்கன் நிதானமாக விளையாடி 34 பந்துகளில் 30 ரன்கள் சேர்த்தார். பாட் கம்மின்ஸ் (4), குல்தீப் யாதவ் (12), லோக்கி ஃபர்குசன் (19) ஆகியோர் ஓரளவுக்குத் தாக்குப்பிடித்து விளையாடியதால், கொல்கத்தா அணி 20 ஓவர்கள் முடிவில் 8 விக்கெட்களை இழந்து ஏதோ 84 ரன்கள் எடுத்தது.

85 ரன்கள் எடுத்தால் வெற்றி என்ற எளிய இலக்கை நோக்கி ராயல் சேலஞ்சர்ஸ் பெங்களூர் அணி களமிறங்கியது. துவக்க வீரர்கள் தேவ்தத் படிக்கல், ஆரோன் ஃபிஞ்ச் ஆகியோர் நிதானமாக விளையாடினர்.பவர் பிளே முடிந்தவுடன், ஃபர்குசன் வீசிய ஓவரில் தேவ்தத் படிக்கல் (25), ஆரோன் ஃபிஞ்ச் (16) ஆகியோர் அடுத்தடுத்து ஆட்டமிழந்தனர்.

அடுத்துக் களமிறங்கிய விராட் கோலி 18 ரன்கள் சேர்த்தும், குர்கீரத் சிங் 21 ரன்கள் எடுத்தும் நிதானமாக விளையாடி அணியை வெற்றிப்பாதை நோக்கி அழைத்துச் சென்றனர். இறுதியில் பெங்களூர் அணி 13.3 ஓவர்கள் முடிவில் 2 விக்கெட்களை இழந்து 85 ரன்கள் சேர்த்து 8 விக்கெட்கள் வித்தியாசத்தில் வெற்றிபெற்றது.

பெங்களூர் அணியின் அனைத்து பௌலர்களும் இன்று விஸ்வரூபம் எடுத்தனர். குறிப்பாக, முகமது சிராஜ் 4 ஓவர்கள் வீசி 3 விக்கெட்களை கைப்பற்றினார். அதேபோல், யுஷ்வேந்திர சஹல் 15 ரன்கள் விட்டுக்கொடுத்து 2 விக்கெட்களை கைப்பற்றினார்.

ஐபிஎல் போட்டிகளில் 10 விக்கெட்டுகளையும் இழக்காமல், ஆனால் குறைந்த ஸ்கோரை (84/8) எடுத்த அணி என்ற மோசமான சாதனையை இன்று படைத்துள்ளது கொல்கத்தா நைட் ரைடர்ஸ். பெங்களூர் அணி பெளலர்கள் இன்றைய போட்டியில் மொத்தம் 4 ஓவர்கள் ரன் எதுவும் தராமல் (மெய்டன்) பந்து வீசியுள்ளனர். ஐபிஎல் போட்டிகளில் இதுவொரு சாதனையாகும்.

Be the first to comment on "RCB vs KKR: கொல்கத்தா பேட்ஸ்மேன்களை கதறவிட்ட சிராஜ்… பெங்களூர் அணி மிரட்டல் வெற்றி!"

Leave a comment

Your email address will not be published.