KKR vs KXIP: கொல்கத்தா சொதப்பல் ஆட்டம்…பஞ்சாப் அணி அபார வெற்றி!

முதலில் களமிறங்கிய கொல்கத்தா அணி 9 விக்கெட்கள் இழப்பிற்கு 149 ரன்களும், பஞ்சாப் அணி 18.5 ஓவர்கள் முடிவில் 2 விக்கெட்களை மட்டும் இழந்து 150 ரன்களும் எடுத்தன.

ஷார்ஜாவில் நடைபெற்ற இன்றைய போட்டியில் டாஸ் வென்ற கிங்ஸ் லெவன் பஞ்சாப் அணி பீல்டிங் தேர்வு செய்தது. முதலில் களமிறங்கிய கொல்கத்தா அணி அடுத்தடுத்து விக்கெட்களை இழந்து தடுமாறியது. துவக்க வீரர் நிதிஷ் ராணா சந்தித்த முதல் பந்தில் ஆட்டமிழந்து வெளியேறினார்.

அடுத்துக் களமிறங்கிய ராகுல் திரிபாதி (7), தினேஷ் கார்த்திக் ஆகியோரும் விரைவில் பெவிலியன் திரும்பினர். இதனால், கொல்கத்தா அணி 10 ரன்களுக்கு மூன்று விக்கெட்களை இழந்து தடுமாறியது.

அடுத்துக் களமிறங்கிய கேப்டன் இயான் மோர்கன், துவக்க வீரர் ஷுப்மன் கில்லுடன் இணைந்து பார்ட்னர்ஷிப் அமைத்து விளையாடினார். அதிரடியாக விளையாடிய இயான் மோர்கன் 25 பந்துகளில் 2 சிக்ஸர், 5 பவுண்டரிகள் விளாசி 40 ரன்கள் சேர்த்து ஆட்டமிழந்தார்.

சுனில் நரைன், பாட் கம்மின்ஸ் போன்றவர்களும் ஒற்றை இலக்க ரன்களுக்கு அவுட் ஆகினர். கடைசிவரை தாக்குப்பிடித்த ஷுப்ன் கில் 45 பந்துகளில் 57 ரன்கள் சேர்த்து முகமது ஷமியின் வேகத்தில் வீழ்ந்தார். லோக்கி ஃபர்குசன் அவுட் ஆகாமல் 13 பந்துகளில் 24* ரன்கள் சேர்த்தார். இதனால், கொல்கத்தா அணி 20 ஓவர்கள் முடிவில் 9 விக்கெட்களை இழந்து 149 ரன்கள் சேர்த்தது.

முகமது ஷமி 3 விக்கெட்களை கைப்பற்றி அசத்தினார். கிறிஸ் ஜோர்டன், ரவி பிஸ்னாய் ஆகியோர் தலா இரண்டு விக்கெட்களை வீழ்த்தினர்.

150 ரன்கள் எடுத்தால் வெற்றி என்ற நிலையில் களமிறங்கிய கிங்ஸ் லெவன் பஞ்சாப் அணி சிறப்பாக விளையாடியது. துவக்க வீரர் கேப்டன் கே.எல்.ராகுல் 25 பந்துகளில் 28 ரன்கள் சேர்த்து வருண் சக்கரவர்த்தியிடம் வீழ்ந்தார். அடுத்துக் களமிறங்கிய கிறிஸ் கெய்ல், மந்தீப் சிங்குடன் பார்ட்னர்ஷிப் அமைத்து விளையாடினார்.

கிறிஸ் கெய்ல் 29 பந்துகளில் 5 சிக்ஸர், 2 பவுண்டரிகள் விளாசி 51 ரன்கள் சேர்த்து லோக்கி ஃபர்குசன் பந்தில் ஆட்டமிழந்தார். மறுமுனையில் அதிரடி காட்டிய மந்தீப் சிங் 56 பந்துகளில் 2 சிக்ஸர், 8 பவுண்டரிகள் விளாசி 66 ரன்கள் சேர்த்து கடைசி வரை களத்தில் இருந்தார்.

நிகோலஸ் பூரன் 2 ரன்கள் எடுத்தார். இறுதியில் கிங்ஸ் லெவன் பஞ்சாப் அணி 18.5 ஓவர்களில் 150 ரன்கள் சேர்த்து 8 விக்கெட்கள் வித்தியாசத்தில் வெற்றிபெற்று, புள்ளிப்பட்டியலில் நான்காவது இடத்திற்கு முன்னேறி பிளே ஆஃப் சுற்றுக்கான வாய்ப்பை அதிகப்படுத்தியுள்ளது.

Be the first to comment on "KKR vs KXIP: கொல்கத்தா சொதப்பல் ஆட்டம்…பஞ்சாப் அணி அபார வெற்றி!"

Leave a comment

Your email address will not be published.