IPL 2021: கேதர் ஜாதவை ஏலம் எடுக்க தயாராகும் மூன்று அணிகள்!

Teams that can pick Kedar Jadav in IPL auction 2021
Teams that can pick Kedar Jadav in IPL auction 2021

கேதர் ஜாதவை ஏலம் எடுக்க மூன்று அணிகள் கடும் போட்டியிட வாய்ப்புள்ளது.

ஐபிஎல் 13ஆவது சீசனில் சென்னை சூப்பர் கிங்ஸ் அணிக்காக மிடில் வரிசையில் களமிறங்கிய கேதர் ஜாதவ், 5 போட்டிகளில் 93.94 ஸ்டைக் ரேட்டுன் 62 ரன்கள் மட்டுமே சேர்த்தார். இந்த அணி முதல்முறையாக பிளே ஆஃப் சுற்று வாய்ப்பை இழந்ததற்கு ஜாதவ் சொதப்பல் தான் முக்கிய காரணமாகப் பார்க்கப்படுகிறது. இதனால், 7.8 கோடிக்கு வாங்கப்பட்ட இவர் தற்போது அணியிலிருந்து விடுவிக்கப்பட்டுள்ளார்.

அதன்பிறகு, சமீபத்தில் நடந்து முடிந்த சையத் முஷ்டாக் அலி டி20 தொடரில் 5 இன்னிங்ஸ் களமிறங்கி 193 ரன்கள் குவித்தார். குறிப்பாக ஒரு போட்டியில் 45 பந்துகளில் 84* ரன்கள் அடித்து மும்பை அணிக்கு வெற்றியைப் பெற்றுக் கொடுத்துள்ளதால், ஜாதவின் மதிப்பு தற்போது உயர்ந்துள்ளது. இதனால் பிப்ரவரி 18ஆம் தேதி நடைபெறும் ஐபிஎல் ஏலம் எடுக்க மூன்று அணிகள் கடும் போட்டியிடும் என எதிர்பார்க்கப்படுகிறது.

3 – ராயல் சேலஞ்சர்ஸ் பெங்களூர்

பெங்களூர் அணியில் ஷிவம் துபே, கிறிஸ் மோரிஸ், குர்கீரத் சிங் மேனன், மொயின் அலி போன்ற மிடில் வரிசை பேட்ஸ்மேன்கள் கடந்த சீசனில் சிறப்பாக சோபிக்காததால் விராட் கோலி, ஏபி டிவிலியர்ஸ் போன்றவர்கள் கடைசி ஓவர் வரை நிலைத்து நின்று விளையாட வேண்டிய நெருக்கடி ஏற்பட்டது. தற்போது கிறிஸ் மோரிஸ், ஷிவம் துபே போன்றவர்கள் நீக்கப்பட்டுள்ளனர். அனுபவமிக்க மிடில் வரிசை வீரர்களை இணைக்க அவர்கள் திட்டமிட்டுள்ளதாகத் தெரிகிறது. கேதர் ஜாதவ் 2016, 2017ஆம் ஆண்டுகளில் பெங்களூர் அணிக்காக நல்லமுறையில் சோபித்தார். இதனால், அவரை மீண்டும் அணியில் இணைக்க வாய்ப்புள்ளது.

2 – கிங்ஸ் லெவன் பஞ்சாப்

பஞ்சாப் அணியிலிருந்து மிடில் வரிசை வீரர்கள் கிளென் மேக்ஸ்வெல், ஜேம்ஸ் நீசம், கிருஷ்ணப்பா கௌதம் போன்றவர்கள் விடுவிக்கப்பட்டுள்ளனர். இவர்களுக்கு மாற்றாக பெஸ்ட் பினிஷரை அணியில் இணைக்க நிர்வாகம் திட்டமிட்டுள்ளது. சமீபத்தில் நடந்து முடிந்த சையத் முஷ்டாக் அலி டி20 தொடரில் ஜாதவ் சிறப்பாகச் செயல்பட்டதன் அடிப்படையில் அவருக்கு முன்னுரிமை கொடுக்கப்படும் எனக் கருதப்படுகிறது.

1 – ராஜஸ்தான் ராயல்ஸ்

ராஜஸ்தான் அணியில் மிடில் வரிசை வீரர்கள் பிரச்சினை இருந்ததால் ஜோஸ் பட்லர் மிடில் வரிசையில் களமிறங்கும் நிலை ஏற்பட்டது. ரோபின் உத்தப்பா, பென் ஸ்டோக்ஸ் பேட்டிங் வரிசையை அவ்வப்போது மாற்றியமைக்கும் நிலையும் உருவானது. இதை சரிசெய்ய அனுபவம் வாய்ந்த மிடில் வரிசை வீரரை தேடிக் கொண்டிருக்கின்றனர். இதனால், தற்போது சென்னை சூப்பர் கிங்ஸ் அணியிலிருந்து விடுவிக்கப்பட்டுள்ள ஜாதவ், இளம் கேப்டன் சஞ்சு சாம்சன் அணிக்குச் செல்ல வாய்ப்புள்ளது.

Be the first to comment on "IPL 2021: கேதர் ஜாதவை ஏலம் எடுக்க தயாராகும் மூன்று அணிகள்!"

Leave a comment

Your email address will not be published.