Covid-19: கொரோனா வைரஸுக்கு எதிரான போராட்டத்தில் நிச்சயம் வெல்வோம் : கபில் தேவ்!

புதுடெல்லி: கொரோனா வைரஸூக்கு எதிரான போராடத்தில் நாம் நிச்சயமாக வெல்வோம் என முன்னாள் இந்திய கேப்டன் கபில் தேவ் தெரிவித்துள்ளார்.

இந்தியாவில் கொரோனா காட்டுத்தீ போல படுவேகமாக பரவி வருகிறது. இதை கட்டுப்படுத்த நாட்டு மக்கள் அனைவரும் வீட்டிலேயே இருக்கும் படி பிரதமர் மோடி கேட்டுக்கொண்டுள்ளார். இதற்காக நாடு முழுதும் வரும் ஏப்ரல் 14ஆம் தேதிவரை முடக்கப்பட்டுள்ளது. இதன் முக்கியத்துவத்தை உணர்த்தும் விதமாக பிரபல கிரிக்கெட் வீரர்கள் மக்களை வீட்டிலேயே இருக்கும் படி சமூக வலைதளம் மூலம் கேட்டுக்கொண்டுள்ளனர்.

இந்த வரிசையில் முன்னாள் இந்திய கிரிக்கெட் அணியின் முன்னாள் கேப்டன் கபில் தேவ் கூறுகையில், “லாக் டவுன் மக்கள் வீட்டின் உள்ளேயே இருப்பதற்காக தான் போடப்பட்டுள்ளது. அதனால் மக்கள் அனைவரும் வீட்டின் உள்ளேயே இருக்க வேண்டும். அப்படி செய்தால், கொரோனா பரவுவதை தடுக்க முடியும்.

இதுபோன்ற நேரத்தை குடும்பத்தாருடன் செலவிடுங்கள். புத்தகம், டிவி, மியூசிக் என மகிழ்ச்சியாக செலவிடுங்கள். அதைவிட சிறந்தது உங்கள் குடும்பத்தாருடன் உரையாடுங்கள், மனம் திறந்து பேசுங்கள். நான் எனது நேரத்தை வீட்டை தூய்மை செய்வதிலும் தோட்டத்தை பராமரிப்பதிலும், செலவிடுகிறேன். எனது சிறு தோட்டம் தான் தற்போது என் கோல்ப் மைதானம். என் குடும்பத்துடன் நேரம் செலவிட இது நல்ல வாய்ப்பாக உள்ளது.

இதுபோன்ற நேரம் கிடைக்காமல் கடந்த சில ஆண்டுகளாக தவித்து வந்தேன். மேலும் என் மனைவியுடன் சேர்ந்து சமையலும் செய்கிறேன். மக்கள் தற்போது தூய்மையின் மகத்துவத்தை பாடமாக கற்றுக்கொள்வார்கள். கைகளை சுத்தமாக வைத்துக்கொள்வதும், பொது இடத்தில் சிறுநீர் கழிக்க கூடாது என்றும் சுற்றுப்புறத்தை சுத்தமாக வைத்துக்கொள்வதின் அருமையை இனி எப்போதும் மறக்க மாட்டார்கள் என நினைக்கிறேன். இந்த சூழலில் இருந்து விரைவில் மீண்டு வருவோம் என நினைக்கிறேன்” என்றார்.

Be the first to comment on "Covid-19: கொரோனா வைரஸுக்கு எதிரான போராட்டத்தில் நிச்சயம் வெல்வோம் : கபில் தேவ்!"

Leave a comment

Your email address will not be published.


*