புதுடெல்லி: இந்திய கிரிக்கெட் அணியின் முன்னாள் கேப்டன் தோனியின் விக்கெட் கீப்பர் இடத்தை நிரப்ப பிசிசிஐ இதுவரை படாதபாடுபட்டு வருகிறது.

இந்திய கிரிக்கெட் அணியின் முன்னாள் கேப்டன் தோனி இவரின் தலைமையில் இந்திய கிரிக்கெட் அணி பல உச்சங்களை எட்டியுள்ளது. முன்னாள் கேப்டனாக மட்டுமில்லாமல் இந்திய கிரிக்கெட் அணியின் விக்கெட் கீப்பராகவும் சிறந்த பினிஷராகவும் இருந்ததால் அவரின் இடத்திற்கு சரியான மாற்று வீரரை பிசிசிஐ கிட்டத்தட்ட ஆறு வருஷமாக பூர்த்தி செய்ய தடுமாறி வருகிறது.

கபில்தேவ்க்குப் பிறகு இந்திய கிரிக்கெட் அணி உலகக்கோப்பையை வென்று கொடுத்தவர் கேப்டனாக இருந்த மகேந்திரசிங் தோனிதான். சர்வதேச ஒருநாள் போட்டி உலகக்கோப்பை, டி20 உலகக்கோப்பை என இரண்டு வகையான போட்டி உலகக்கோப்பைகளையும் திறமையான கேப்டனாக செயல்பட்டு வென்றுகொடுத்த தோனி இந்திய கிரிக்கெட் வரலாற்றில் மிகச்சிறந்த வீரர், தி லெஜண்ட் என்றால் அது மிகையல்ல.

அத்தகை திறமை மிக்க புகழ்மிகு தல தோனி தற்போது போட்டிகளில் முன்பைப் போல ஜொலிக்காமல் தடுமாறி வருகிறார்.

ஒருநாள் கிரிக்கெட்டில் தோனி இல்லாத நிலையில் இந்திய கிரிக்கெட் கேப்டன் விராட் கோலி கே.எல். ராகுலை சோதனை முறையில் விக்கெட் கீப்பர் மற்றும் மிடில் ஆர்டர் பேட்ஸ்மேன் என ஆஸ்திரேலிய தொடரில் வெற்றி கண்டார். இதை இன்னும் கொஞ்ச நாட்கள் தொடர்வார் என தெரிகிறது. இதனால் இனி ரிஷப் பந்த் மற்றும் சஞ்சு சாம்சனுக்கு விளையாடும் லெவனில் இடம் கிடைக்க காத்திருக்கும் நிலை ஏற்பட்டுள்ளது. இவர்களை தொடர்ந்து இளம் வீரர்களான கே.எஸ் பரத் மற்றும் இஷான் கிஷான் ஆகியோரும் வரிசையில் உள்ளனர்.

இந்திய கிரிக்கெட் அணி விக்கெட் கீப்பரை இப்படி வலைவீசி தேடுவது இது முதல் முறையல்ல. ஏற்கனவே நயன் மோங்கியாவின் ஓய்வுக்கு பின் இந்திய அணி எம்.எஸ்.கே பிரசாத், சாபா கரீம், விஜய் தஹியா, சமீர் திகே, தீப் தாஸ்குப்தா, அஜய் ராத்ரா, ராகுல் திராவிட், பார்த்தீவ் படேல், தினேஷ் கார்த்திக் என பல விக்கெட் கீப்பர்களை பயன்படுத்தியது. அதன் பிறகு தோனி ஒருவழியாக விக்கெட் கீப்பர் இடத்தை கெட்டியாக பிடித்தார். கடந்த 16 மாதங்களில் இந்திய அணி 5 விக்கெட் கீப்பர்களை பயன்படுத்தியது. தற்போது கடந்த 2003 உலகக்கோப்பை கிரிக்கெட் தொடரில் திராவிட்டை பயன்படுத்தியது போல தற்போதைக்கு ராகுவை வைத்து இந்திய அணி தற்காலிகமாக செட்டிலாகியுள்ளது.