மும்பை: இந்தியா மற்றும் ஆஸ்திரேலிய மகளிர் அணிகளுக்கு இடையேயான மூன்று போட்டிகள் கொண்ட டி20 தொடரின் முதலாவது போட்டியில் இந்திய அணியும், இரண்டாவது போட்டியில் ஆஸ்திரேலிய அணியும் வெற்றிபெற்று தொடரை 1-1 என்ற கணக்கில் சமன்செய்துள்ள நிலையில், தொடரின் வெற்றியளாரைத் தீர்மானிக்கும் மூன்றாவது மற்றும் கடைசி டி20 போட்டி நேற்று டி. ஒய். பாட்டீல் மைதானத்தில் நடைபெற்றது.

இப்போட்டியில் டாஸ் வென்ற ஆஸ்திரேலிய மகளிர் அணி முதலில் பந்துவீச்சை தேர்வு செய்தது. அதன்படி பேட்டிங் செய்ய களமிறங்கிய இந்திய மகளிர் அணியின் தொடக்க வீராங்கனைகளான ஷஃபாலி வர்மா-ஸ்மிருதி மந்தனா ஜோடியில் அதிரடியாக விளையாடிய ஷஃபாலி வர்மா 26(17) ரன்களில் ஆட்டமிழக்க, தொடர்ந்துவந்த அனுபவ வீராங்கனை ஜெமிமா ரோட்ரிக்ஸ் 2(7) ரன்களுக்கு விக்கெட்டை இழந்து ஏமாற்றமளித்தார்.

அதேசமயம் மறுமுனையில் சிறப்பான ஆட்டத்தை வெளிப்படுத்திய ஸ்மிருதி மந்தனா 29(28) ரன்களுக்கு வெளியேறினார். இவர்களைத்தொடர்ந்து களமிறங்கிய கேப்டன் ஹர்மன்ப்ரீத் கவுர் 3(6) இப்போட்டியிலும் சொற்ப ரன்களுக்கு ஆட்டமிழக்க, அடுத்துவந்த தீப்தி சர்மாவும் 14(18) ரன்களில் விக்கெட்டை இழந்தார். இருப்பினும் மறுமுனையில் அதிரடியாக விளையாடி வந்த ரிசா கோஷ் 34(28) ரன்களைச் சேர்த்து ஆட்டமிழக்க, இறுதிவரை ஆட்டமிழக்காமல் களத்திலிருந்த அமன்ஜோத் கவுர் 17(14) ரன்களையும், பூஜா வஸ்திரேகர் ஒரு சிக்சர் விளாசியும் ஃபினிஷிங் கொடுத்தனர்.

இதனால் 20 ஓவர்கள் முடிவில் இந்திய மகளிர் அணி 6 விக்கெட்டுகள் இழப்பிற்கு 147 ரன்களைக் குவித்தது. இதில் ஆஸ்திரேலிய அணி தரப்பில் அனபெல் சதர்லேண்ட், ஜார்ஜியா வர்ஹாம் தலா 2 விக்கெட்டுகளையும், மேகன் ஷாட், ஆஷ்லே கார்ட்னார் தலா ஒரு விக்கெட்டையும் கைப்பற்றினர். இதையடுத்து இலக்கை துரத்திக் கொண்டு களமிறங்கிய ஆஸ்திரேலிய மகளிர் அணியின் தொடக்க வீராங்கனைகளான கேப்டன் அலிசா ஹீலி  -பெத் மூனி ஜோடி அதிரடியான ஆட்டத்தை வெளிப்படுத்தி அணியின் ஸ்கோரை உயர்த்தியதுடன் முதல் விக்கெட்டிற்கு 85 ரன்களைச் சேர்த்தனர். 

இதில் அதிரடியாக விளையாடி அரைசதம் கடந்த அலிசா ஹீலி 55(38) ரன்களைச் சேர்த்து தீப்தி ஷர்மா பந்துவீச்சில் ஆட்டமிழக்க, தொடர்ந்து வந்த தஹிலா மெக்ராத் 20(15) ரன்களிலும், எல்லிஸ் பெர்ரி முதல் பந்திலேயும் பூஜா வஸ்திரேகர் பந்துவீச்சில் விக்கெட்டை இழந்து பெவிலியனுக்கு நடையைக்கட்டினர். ஆனால் மறுமுனையில் அரைசதம் கடந்திருந்த பெத் மூனி 52(45) ரன்களையும், ஃபோப் லிட்ச்ஃபீல் 17(13) ரன்களையும் சேர்த்து இறுதிவரை ஆட்டமிழக்காமல் களத்திலிருந்து அணிக்கு வெற்றியைத் தேடிக்கொடுத்தனர். இதன்மூலம் ஆஸ்திரேலிய மகளிர் அணி 18.4 ஓவர்களிலேயே இலக்கை எட்டியதுடன் 7 விக்கெட் வித்தியாசத்தில் இந்திய மகளிர் அணியை வீழ்த்தி அபார வெற்றிபெற்றது. இந்த வெற்றியின் மூலம் ஆஸ்திரேலிய மகளிர் அணி 2-1 என்ற கணக்கில் டி20 தொடரை கைப்பற்றி அசத்தியுள்ளது.