2-வது டெஸ்ட்டில் டேவிட் வார்னர், சீன் அபோட் விளையாட மாட்டார்கள் !!! – ஆஸ்திரேலியா கிரிக்கெட் வாரியம் அறிவிப்பு . . .

இந்தியா – ஆஸ்திரேலிய அணிகள் மோதும் 2-வது டெஸ்ட் போட்டியில் டேவிட் வார்னர், சீன் அபோட் விளையாட மாட்டார்கள் என்று ஆஸ்திரேலியா கிரிக்கெட் வாரியம் அறிவித்துள்ளது. . .

இந்தியா, ஆஸ்திரேலியா இடையில் டிசம்பர் 26ஆம் தேதி துவங்கவுள்ள பாக்ஸிங் டே டெஸ்ட் போட்டியிலிருந்து ஆஸ்திரேலிய அணியின் துவக்க வீரர் டேவின் வார்னர், ஆல்-ரவுண்டர் சீன் அபோட் நீக்கப்பட்டுள்ளதாக ஆஸ்திரேலிய கிரிக்கெட் வாரியம் அறிவித்துள்ளது.

நவம்பர் 29ஆம் தேதி சிட்னியில் நடைபெற்ற இந்தியா, ஆஸ்திரேலியா இடையிலான இரண்டாவது ஒருநாள் போட்டியில் பீல்டிங் செய்துகொண்டிருந்த டேவிட் வார்னருக்கு எதிர்பாராத விதமாக இடுப்பு பகுதியில் தசைப்பிடிப்பு ஏற்பட்டது. இதனைத் தொடர்ந்து அவசர அவசரமாக மருத்துவமனைக்கு அழைத்துச் செல்லப்பட்டார்.

இவரைப் பரிசோதித்த டாக்டர் சில நாட்கள் ஓய்வில் இருக்கும்படி கேட்டுக்கொண்டதாக்க கூறப்படுகிறது. இதனால், மூன்றாவது ஒருநாள், டி20 தொடர் ஆகியவற்றில் வார்னர் பங்கேற்கவில்லை. முதல் டெஸ்ட் போட்டியின்போதும் ஓய்வில் இருந்தார். இந்நிலையில் தற்போது இரண்டாவது டெஸ்ட் போட்டியிலிருந்தும் நீக்கப்பட்டுள்ளார்.

அதேபோல் ஆல்ரவுண்டர் சீன் அபோட், இந்தியாவுக்கு எதிரான பயிற்சி டெஸ்டில் விளையாடியபோது காயத்தால் அவதிப்பட்டார். இதனால், முதல் டெஸ்ட் போட்டியில் அவர் பங்கேற்கவில்லை. தற்போது இரண்டாவது டெஸ்டிலும் விளையாட முடியாத நிலை ஏற்பட்டுள்ளது.

இதுகுறித்து ஆஸ்திரேலிய கிரிக்கெட் வாரியம் வெளியிட்டுள்ள அறிக்கையில், “வீரர்கள் மீண்டும் அணியில் இணைய வேண்டும் என்றால் மருத்துவப் பாதுகாப்பு விதிமுறைப்படி 14 நாட்கள் தனிமை முகாமிற்குச் செல்ல வேண்டும். இது கண்டிப்புடன் கடைப்பிடிக்கப்படும் விதி. இதனால், காயத்திருந்து மீண்டு வரும் வீரர்கள் உடனே அணியில் இணைவதற்குச் சாத்தியமில்லை.

டேவிட் வார்னருக்கு இடுப்பு பகுதியில் ஏற்பட்ட காயம் இன்னும் குணமடையவில்லை. அதனால், அவர் இரண்டாவது டெஸ்ட் போட்டியில் பங்கேற்க முடியாது. சீன் அபோட் பயிற்சி டெஸ்ட் போட்டியில் ஏற்பட்ட காயத்திலிருந்து மீண்டுவிட்டார். ஆனால், மருத்துவப் பாதுகாப்பு விதிமுறைப்படி அவர் 14 நாள்கள் தனிமை முகாமில் இருப்பதால், அவரும் பங்கேற்க முடியாத நிலை ஏற்பட்டுள்ளது” எனத் தெரிவிக்கப்பட்டுள்ளது.

வார்னர் நீக்கப்பட்டுள்ளதால் ஆஸ்திரேலிய அணியில் ஜோ பர்ன்ஸ், மேத்யூ வேட் துவக்க வீரர்களாக மீண்டும் களமிறங்குவது உறுதியாகியுள்ளது. மேலும், XI அணியில் எவ்வித மாற்றங்களும் இருக்காது எனவும் கூறப்படுகிறது.
எனவே முதல் டெஸ்ட்டில் விளையாடிய ஆஸ்திரேலிய அணியே 2-வது போட்டியிலும் களம் இறங்கும் என்று எதிர்பார்க்கப்படுகிறது.

Be the first to comment on "2-வது டெஸ்ட்டில் டேவிட் வார்னர், சீன் அபோட் விளையாட மாட்டார்கள் !!! – ஆஸ்திரேலியா கிரிக்கெட் வாரியம் அறிவிப்பு . . ."

Leave a comment

Your email address will not be published.