160 அடிச்சாலே போதும்… வெற்றி நிச்சயம்: RCB நம்பிக்கை!

ஐக்கிய அரபு அமீரகத்தில் நடைபெறவுள்ள ஐபிஎல் தொடரில் சுழற்பந்து வீச்சாளர்கள் ஆதிக்கம் செலுத்த அதிக வாய்ப்பிருக்கிறது. அதனால், 150 அல்லது 160 ரன்கள் எடுத்தாலே வெற்றிபெற அதிக வாய்ப்புள்ளது என்று பெங்களூரு அணியின் இயக்குநர் மைக் ஹெஸன் தெரிவித்துள்ளார்.

மைக் ஹெஸன் பேசிய வீடியோ ஒன்றைப் பெங்களூரு அணி ட்விட்டரில் பதிவிட்டுள்ளது. “துபாய், ஷார்ஜா, அபுதாபி மைதானங்கள் சுழற்பந்து வீச்சாளர்களுக்குச் சாதகமாக இருக்கும். என்னைப் பொறுத்தவரை அபுதாபி மிகப்பெரிய மைதானம். சுழல்பந்து வீச்சுக்கு ஏற்ற மைதானம். அதில் 150-160 ரன்கள் எடுத்தாலே போதும்.

துபாய், ஷர்ஜா மைதானங்களில் பந்துகள் அவ்வளவாகச் சுழலுக்குச் சாதகமாக இருக்காது என்று கருதுகிறேன்” எனக் கூறியுள்ளார்.

மேலும், “மைதானங்கள் பற்றிய அனைத்து தரவுகளையும் சேகரித்து வைத்துள்ளோம். சூழ்நிலைக்கு தகுந்தவாறு செயல்பட்டால் வெற்றி உறுதி. குறிப்பாகச் சுழற்பந்து வீச்சாளர்கள் சிறப்பாக சோபித்தால் அதைவிட நல்ல செய்தி வேறு எதுவும் இருக்காது” எனத் தெரிவித்தார்.

பெங்களூரு அணியில் அதிரடி வீரர்கள் படை இருந்தாலும், கடந்த 12 வருடங்களில் ஒருமுறை கூட கோப்பை வெல்ல முடியவில்லை. அணியில் உள்ள குறைகளையெல்லாம் கலைந்து, இத்தொடரில் வலுவான அணியாக செயல்படுவதற்கு உண்டான அனைத்தையும் செய்து வருகிறோம் என்று ஹெஸன் கூறினார்.

“அணியில் உள்ள குறைகளைக் கலைவதற்கு நீண்ட காலத்தைச் செலவு செய்து, எங்கு சொதப்புகிறோம் என்பதைக் கண்டுபிடித்துள்ளோம். அந்தத் தவறை இந்த வருடம் செய்ய மாட்டோம். அனைத்துப் போட்டிகளிலும் அபார வெற்றிபெற விரும்புகிறோம். தகுதியான, அதிரடியான பல வீரர்கள் எங்கள் அணியில் உள்ளனர். அவர்களால் இதைச் சாத்தியப்படுத்த முடியும்” என்று தெரிவித்தார்.

“கடந்த காலங்களில் சிறப்பாக சோபிக்காத வீரர்களுக்குத் தகுந்த அறிவுரை வழங்கப்பட்டுள்ளது. அவர்கள் இந்த வருடமும் மோசமான செயல்பாட்டை வெளிப்படுத்தினால், அணியில் இருந்து ஓரங்கட்டப்பட அதிக வாய்ப்புள்ளது. வெற்றிதான் எங்களுக்கு முதன்மையானது. அதில் எவ்வித சமரசத்திற்கும் இடமில்லை” என்று அதிரடியாகக் கூறினார்.

2009, 2011, 2016 ஆகிய ஆண்டுகளில் இறுதிப் போட்டி வரை முன்னேறிய பெங்களூரு அணி ஒருமுறை கூட கோப்பை வெல்லவில்லை. செப்டம்பர் 19ஆம் தேதி தொடங்கவுள்ள முதல் லீக் போட்டியில் சென்னை அணி மும்பையை எதிர்கொள்கிறது. 21ஆம் தேதி பெங்களூரு அணி, சன் ரைசர்ஸ் ஹைதராபாத் அணியை எதிர்கொண்டு விளையாட உள்ளது.

இந்த வருடமும் கோப்பை நமதே என்ற முழக்கத்துடன் களமிறங்கவுள்ள பெங்களூரு அணி முதல் கோப்பை வென்று ரசிகர்களை குஷிப்படுத்துமா என்பதைப் பொறுத்திருந்து பார்ப்போம்.

Be the first to comment on "160 அடிச்சாலே போதும்… வெற்றி நிச்சயம்: RCB நம்பிக்கை!"

Leave a comment

Your email address will not be published.


*