14 நாட்கள் தனிமைச் சிறை, அதன்பின் இங்கிலாந்து, வெஸ்ட் இண்டீஸ் மோதல்!

கொரோனா ஊரடங்கிற்குப் பிறகு முதல் சர்வதேச டெஸ்ட் தொடர் அறிவிக்கப்பட்டுள்ளது. இங்கிலாந்து, மேற்கிந்திய அணிகள் பங்கேற்கும் இந்த டெஸ்ட் தொடர் இங்கிலாந்தில் வரும் ஜூலை 8ஆம் தேதி தொடங்கும் என அறிவிக்கப்பட்டுள்ளது.

இந்த போட்டியில் பங்கேற்பதற்காக மேற்கிந்தியத் தீவுகள் அணி ஜூன் 9ஆம் தேதி இங்கிலாந்தைச் சென்றடையும் எனத் தகவல் வெளியாகியுள்ளது. இங்கிலாந்து சென்றடையும் வீரர்கள் பயிற்சியாளர்கள் அனைவரும் 14 நாட்கள் தனிமைப்படுத்தப் பின்னரே போட்டியில் பங்கேற்க அனுமதிக்கப்படுவர். இதற்கிடையே அவர்களுக்கு கொரோனா பரிசோதனையும் நடத்தப்படும்.

போட்டியில் பங்கேற்கச் செல்லும் மேற்கிந்தியத் தீவு அணி வீரர்கள் இங்கிலாந்து ஓல்ட் டிராஃபோர்டில் தங்க வைக்கப்படுவர். கொரோனா பரிசோதனையில் வீரர்கள் பாசானபின் அவர்கள் மூன்று வாரம் பயிற்சியில் ஈடுபடத் திட்டமிட்டுள்ளனர்.

இரு அணிகள் மோதும் முதல் டெஸ்ட் போட்டி சௌதம்டன் மைதானத்தில் ஜூலை 8ஆம் தேதி தொடங்குகிறது. அதைத் தொடர்ந்து இரண்டாவது, மூன்றாவது டெஸ்ட் போட்டிகள் மான்செஸ்டரில் ஜூலை 16, 24ஆம் தேதிகளில் தொடங்கி நடைபெற உள்ளது.  கொரோனா காலத்தில் நடத்தப்படும் இந்த போட்டிகளுக்கு இங்கிலாந்து கிரிக்கெட் கவுன்சில் புதிதாகப் பல விதிமுறைகளை விதித்துள்ளது.

போட்டியில் பங்கேற்கும் வீரர்கள் சமூக இடை வெளியை உறுதி செய்வது, சுற்றுப்புற சுகாதாரத்தை உறுதி செய்வது போன்றவற்றைக் கடைப்பிடித்தால் மட்டுமே போட்டியில் அனுமதிக்கப்படுவர் என இங்கிலாந்து கிரிக்கெட் கவுன்சில் தெளிவுபடுத்தியுள்ளது.

அதே வேளையில் களத்தில் இருக்கும் வீரர்கள், நடுவர்கள், பணியாளர்கள், பாதுகாவலர்கள், நேரலை செய்யும் தொலைக்காட்சி ஊழியர்கள் என அனைவருக்கும் உரியப் பாதுகாப்பு வழங்கப்படும் என்றும் அந்நாடு உறுதி அளித்துள்ளது.
இங்கிலாந்து கிரிக்கெட் அணி நிர்வாக இயக்குநர் ஸ்டீவ் எல்வோர்தி போட்டி குறித்துக் கூறுகையில், “இங்கிலாந்து அரசு அனைத்து வகையிலும் உறுதுணையாக இருக்கிறது. மருத்துவ வல்லுநர்களிடமும் தொடர்ந்து ஆலோசனை பெற்று வருகிறோம்” என்றார்.

மேலும் அவர் “மேற்கிந்தியத் தீவு அணி நிர்வாகத்திற்கு நன்றி சொல்லக் கடமைப்பட்டுள்ளோம். எங்கள் அழைப்பை ஏற்று அவர்கள் இந்த போட்டியில் பங்கேற்க உள்ளனர். வரும் நாட்களில் உலகம் முழுவதும் கிரிக்கெட் போட்டிகள் உரிய வழிமுறைகளைப் பின்பற்றி நடைபெறும்’ என நம்பிக்கை தெரிவித்தார்.

கொரோனா தொற்று உலகளவில் பெரும் தாக்கத்தை ஏற்படுத்துவதற்கு முன் மேற்கிந்தியத் தீவு அணி வீரர்கள் இங்கிலாந்தில் கிரிக்கெட் போட்டிக்காக ஜூன் 5ஆம் தேதி சுற்றுப்பயணம் மேற்கொள்ளத் திட்டமிடப்பட்டிருந்தது குறிப்பிடத்தக்கது.

இந்த நேரத்தில் இங்கிலாந்து ஆடவர், மகளிர் கிரிக்கெட் அணி வீரர்கள் பங்கேற்கும் பிற தொடர்களுக்கான அட்டவணை விரைவில் அறிவிக்கப்படும் என்றும் தகவல் வெளியாகியுள்ளது.

Be the first to comment on "14 நாட்கள் தனிமைச் சிறை, அதன்பின் இங்கிலாந்து, வெஸ்ட் இண்டீஸ் மோதல்!"

Leave a comment

Your email address will not be published.