ரஹானேவை கேப்டனா போடுங்க பாஸ்: ஆஸி வீரர் சொல்லும் காரணம் இதுதான்!

இந்திய டெஸ்ட் அணிக்கு அஜிங்கிய ரஹானேவை கேப்டனாக நியமிக்க வேண்டும் என ஆஸ்திரேலிய அணி முன்னாள் வீரர் தெரிவித்துள்ளார்.

ஆஸ்திரேலிய சுற்றுப் பயணம் மேற்கொண்ட இந்திய அணி நான்கு போட்டிகள் கொண்ட டெஸ்ட் தொடரில் பங்கேற்று 2-1 எனத் தொடரைக் கைப்பற்றியது. முதல் போட்டி இரண்டாவது இன்னிங்ஸில், விராட் கோலி தலைமையிலான இந்திய அணி 36 ரன்களுக்கு சுருண்டு 8 விக்கெட்கள் வித்தியாசத்தில் மாபெரும் தோல்வியை சந்தித்து கடுமையான விமர்சனங்களைப் பெற்றது. அதன்பின், விராட் கோலி தனது மனைவியின் பிரசவத்தின்போது அருகில் இருப்பதற்காக நாடு திரும்பினார். இதனால், எஞ்சிய போட்டிகளுக்கு அஜிங்கிய ரஹானே கேப்டனாக நியமிக்கப்பட்டார். இவர் தலைமையிலான அணி மூன்று போட்டிகளிலும் சிறப்பாகச் செயல்பட்டு ஒரு தோல்வியைக் கூட சந்திக்காமல் தொடரைக் கைபற்றி அசத்தியது.

குறிப்பாக, தொடர் யாருக்கு என்பதைத் தீர்மானிக்கும் கடைசி டெஸ்ட் ஆஸ்திரேலியாவின் கோட்டையான பிரிஸ்பேனில் நடைபெற்றது. இங்கு 1988ஆம் ஆண்டுக்குப் பின் ஆஸி ஒருமுறைகூட தோற்றதில்லை. இருப்பினும் இளம் இந்திய அணி அதிரடியாக விளையாடி 3 விக்கெட்கள் வித்தியாசத்தில் வெற்றிபெற்று வரலாற்று சாதனை படைத்தது. அதன்பிறகு, விராட் கோலி மற்றும் அஜிங்கிய ரஹானேவின் கேப்டன்ஸியை ஒப்பிட்டு பலர் கருத்துத் தெரிவிக்க ஆரம்பித்தனர். அஜிங்கிய ரஹானேவை டெஸ்ட் அணியின் கேப்டனாக நியமித்து, விராட் கோலியின் பணிச்சுமையை குறைக்க வேண்டும் என்ற கோரிக்கை வலுக்கத் துவங்கியது. இந்நிலையில் இந்த விவகாரம் தொடர்பாக தற்போது ஆஸ்திரேலிய அணியின் முன்னாள் ஆல்-ரவுண்டர் ஷேன் லீ கருத்துத் தெரிவித்துள்ளார்.

“ஆஸ்திரேலிய சுற்றுப் பயணத்தின்போது ரஹானேவின் கேப்டன்ஸியை பார்த்திருப்பீங்க, அற்புதமா இருந்துச்சு. 10க்கு 10 மார்க் கொடுக்கலாம். இந்திய அணியைத் திறம்பட, சிறப்பாக வழிநடத்தினார். இவர் தலைமையில் வீரர்கள் சகஜமாகச் செயல்பட்டனர்”. “நான் ஒரு அணி வைத்திருந்தால் ரஹானேவைதான் கேப்டனாக நியமிப்பேன். விராட் கோலி ஒன்றும் குறைந்தவர் அல்ல, அற்புதமான பேட்ஸ்மேன். அனைத்து வகை கிரிக்கெட்டிலும் சிறப்பாக விளையாடக் கூடியவர். இவர் அனைத்து வீரர்களிடம் முழுத் திறமையையும் எதிர்பார்க்கிறார். வீரர்களும் சிறப்பாக செயல்படுகின்றனர். ஆனால், கொஞ்சம் பயத்துடனேயே இருக்கிறார்கள் எனக் கருதுகிறேன். ரஹானே முழுச் சுதந்திரம் கொடுக்கிறார். இதனால், வீரர்கள் நெருக்கடி இல்லாமல் செயல்படுகின்றனர்” எனத் தெரிவித்தார்.

கோலி ஒரு பேட்ஸ்மேனாக சிறப்பாக சோபிக்க வேண்டும் என்பதற்காக ரஹானேவை கேப்டனாக நியமிப்பதில் எனக்கு எந்த தயக்கமும் இருக்காது என்றார். “நான் அணித் தேர்வாளராக இருந்தால், ஒருவேளை இருந்தால், ரஹானேவை கேப்டனாக நியமித்து, விராட் கோலியை ஒரு பேட்ஸ்மேனாக செயல்பட அனுமதிப்பேன். காலம்தான் முடிவு செய்யும்” எனக் கூறினார்.

Be the first to comment on "ரஹானேவை கேப்டனா போடுங்க பாஸ்: ஆஸி வீரர் சொல்லும் காரணம் இதுதான்!"

Leave a comment

Your email address will not be published.


*