இலங்கை சுற்றுப் பயணம் மேற்கொள்ளவிருக்கும் இந்திய அணிக்கு ராகுல் திராவிட் பயிற்சியாளராகச் செயல்பட உள்ளதாக தகவல் வெளியாகியுள்ளது.

இந்தியா, நியூசிலாந்து இடையிலான உலக டெஸ்ட் சாம்பியன்ஷிப் தொடரின் இறுதிப் போட்டி வருகிற ஜூன் 18 முதல் 22ஆம் தேதிவரை இங்கிலாந்தில் நடைபெறவுள்ளது. இதனைத் தொடர்ந்து விராட் கோலி தலைமையிலான இந்திய அணி, இங்கிலாந்து அணியுடன் ஆகஸ்ட் 4ஆம் தேதி முதல் 5 போட்டிகள் கொண்ட டெஸ்ட் தொடரில் பங்கேற்கவுள்ளது.

இந்நிலையில், இந்த இடைப்பட்ட காலத்தில் அதாவது ஜூலை மாதம் இந்திய அணி இலங்கை சுற்றுப் பயணம் மேற்கொண்டு 5 டி20 மற்றும் 3 ஒருநாள் போட்டிகளில் பங்கேற்கவுள்ளது. இந்த அணியில் விராட் கோலி, ரோஹித் ஷர்மா, ஜஸ்பரீத் பும்ரா போன்ற முன்னணி வீரர்கள் இடம்பெற மாட்டார்கள் என நேற்று சவுரவ் கங்குலி அறிவித்தார். இந்நிலையில், பயிற்சியாளராக ராகுல் திராவிட் செயல்பட அதிக வாய்ப்பிருப்பதாகக் கூறப்படுகிறது.

இலங்கை சுற்றுப் பயணம் குறித்துப் பேசிய கங்குலி, “ஜூலை மாதத்தில் இந்திய அணி இலங்கை சுற்றுப் பயணம் மேற்கொள்ளவுள்ளது. அந்த நேரத்தில், விராட் கோலி தலைமையிலான இந்திய அணி இங்கிலாந்து சுற்றுப் பயணத்தில் இருக்கும். இதனால், ஐபிஎல் தொடரில் சிறப்பாகச் செயல்பட்ட வீரர்கள் குழு, இலங்கை சுற்றுப் பயணம் மேற்கொள்ளும்” எனத் தெரிவித்தார். இந்த புது இந்திய அணிக்குத் தேசிய கிரிக்கெட் அகடமியின் தலைவராக இருக்கும் ராகுல் திராவிட் தலைமை பயிற்சியாளராக செயல்பட அதிக வாய்ப்பிருப்பதாகத் தகவல் வெளியாகியுள்ளது.

இந்திய அணிக்கு பயிற்சியாளராக வர வேண்டும் என திராவிட்டிம் பலமுறை கோரிக்கை விடுக்கப்பட்டது. ஆனால், அதனை அவர் ஏற்கவில்லை. இதனால்தான், ரவி சாஸ்திரியின் பதவிக் காலம் நீட்டிக்கப்பட்டதாக தகவல் வெளியானது. இந்நிலையில், தற்போது இலங்கை செல்லும் இந்திய அணிக்கு திராவிட் பயிற்சியாளராக செயல்படுவதற்குச் சம்மதம் தெரிவித்திருப்பதாகக் கூறப்படுகிறது. இதனால், விரைவில் ராகுல் திராவிட் இந்திய அணிக்கு முழு நேர தலைமை பயிற்சியாளராகச் செயல்பட அதிக வாய்ப்பிருப்பதாக கிரிக்கெட் விமர்சகர்கள் கருதுகின்றனர்.

இலங்கை செல்லும் இந்திய அணியில், ஐபிஎல் தொடரில் சிறப்பாக சோபித்த சூர்யகுமார் யாதவ், இஷான் கிஷன், ராகுல் தேவத்தியா, சேத்தன் சகார்யா, தேவ்தத் படிக்கல் போன்ற வீரர்களுக்கு வாய்ப்பு கிடைக்கும் எனக் கூறப்படுகிறது. கேப்டனாக ஸ்ரேயஷ் ஐயர் அல்லது ஷிகர் தவன் நியமிக்கப்படலாம் எனவும் கருதப்படுகிறது. இலங்கை சுற்றுப்பயணத்தில் மற்ற முக்கிய வீரர்கள் அணியில் சேருவார்கள் என்று கூறப்படுகிறது.