பேர்ஸ்டோ, மனிஷ் பாண்டே அரை சதம் வீண்…கொல்கத்தா அபார வெற்றி!


நேற்றைய  ஆட்டத்தில் சன்ரைசர்ஸ் ஹைதராபாத் அணியும் கொல்கத்தா நைட்ரைடர்ஸ் அணியும் மோதின. டாஸ் வென்ற ஹைதராபாத் அணி கேப்டன் டேவிட் வார்னர் பந்துவீச்சைத் தேர்வுசெய்தார். நிதிஷ் ரானாவும், ஷுப்மன் கில்லும் துவக்க வீரர்களாகக் களமிறங்கி முதல் விக்கெட்டுக்கு சிறப்பான துவக்கம் தந்து 50 ரன்களைக் கடந்தது. ஸ்கோர் 7 ஓவர்களில் 53 ரன்களாக இருந்தபோது இந்த ஜோடி பிரிந்தது. 13 பந்துகளில் 15 ரன்கள் எடுத்திருந்த ஷுப்மன் கில்லை கிளீன் போல்டாக்கி வெளியேற்றினார் ரஷித் கான்.

வழக்கம்போலவே ரஷித் கான் துல்லியமாகப் பந்துவீச, கொல்கத்தா அணி பேட்ஸ்மேன்கள் ரன் குவிக்கத் திணறினர். ஆனால் மற்ற பந்துவீச்சாளர்களை விட்டுவைக்கவில்லை. கொல்கத்தாவின் இரண்டாவது விக்கெட்டுக்கு 93 ரன்கள் சேர்த்தது. அரைசதம் கடந்த நிலையில் 53 ரன்களில் ராகுல் திரிபாதி வெளியேறினார். அதிகம் எதிர்பார்க்கப்பட்ட ஆந்த்ரே ரஸலும் வந்த வேகத்தில் ரஷித் கானின் பந்துவீச்சுக்கு வெளியேறினார்.

அதிரடியாக விளையாடிக் கொண்டிருந்த நிதிஷ் ரானா 80 ரன்கள் குவித்து முகமது நபி பந்தில் ஆட்டமிழந்தார் பின்னர் அடுத்த பந்தில் மோர்கனையும் அவுட் ஆக்கி அதிர்ச்சியளித்தார். இக்கட்டான இந்த சூழலில் தினேஷ் கார்த்திக்குடன் ஷகிப் அல் ஹசன் களத்தில் இணைந்தார். கடைசி ஓவரில் புவனேஷ்வர் குமார் பந்துகளை பவுண்டரிக்கு பறக்கவிட்ட தினேஷ் கார்த்திக் 9 பந்துகளில் 22 ரன்கள் குவித்தார்.

கொல்கத்தா அணி 20 ஓவர்கள் முடிவில் 187 ரன்கள் குவித்தது. ஹைதராபாத் அணி தரப்பில் முகமது நபி, ரஷித் கான் தலா 2 விக்கெட்டுகள் மற்றும் நடராஜன், புவனேஷ்வருக்கு தலா ஒரு விக்கெட் கிடைத்தது.

ஹைதராபாத் அணியில் துவக்க வீரர்கள் விருத்திமான் சாஹா (7), டேவிட் வார்னர் (3) ஆகியோர் அடுத்தடுத்து ஆட்டமிழந்னர். இருப்பினும், அடுத்துக் களமிறங்கிய மனிஷப் பாண்டே, ஜானி பேட்ஸ்டோ இருவரும் அரை சதம் கடந்து அணியை சரிவிலிருந்து மீட்க துவங்கினர்.

பேர்ஸ்டோ 55 (40) ரன்கள் சேர்த்து ஆட்டமிழந்தார். தொடர்ந்து முகமது நபி (14), விஜய் சங்கர் (11) ஆகியோர் அடுத்தடுத்து பெவிலியன் திரும்பினார்கள். அதனால், போட்டி கொல்கத்தா அணிக்கு சாதகமாக திரும்பியது. இறுதியில் 6 பந்துகளில் 21 ரன்கள் தேவைப்பட்ட நிலையில் சன் ரைசர்ஸ் ஹைதராபாத் அணி 11 ரன்கள் மட்டும் அடித்து 10 ரன்கள் வித்தியாசத்தில் தோல்வியைச் சந்தித்தது. மனிஷ் பாண்டே 61 (44) ரன்கள் விளாசி கடைசி வரை களத்தில் இருந்தார்.

Be the first to comment on "பேர்ஸ்டோ, மனிஷ் பாண்டே அரை சதம் வீண்…கொல்கத்தா அபார வெற்றி!"

Leave a comment

Your email address will not be published.