தென் ஆப்பிரிக்கா அணிக்கு எதிராக 3 ஒருநாள் கிரிக்கெட் போட்டிகளில் விளையாடும் இந்திய அணி அறிவிக்கப்பட்டுள்ளது.

தென்ஆப்பிரிக்க கிரிக்கெட் அணி இந்தியாவில் சுற்றுப்பயணம் மேற்கொண்டு 3 போட்டிகள் கொண்ட ஒரு நாள் போட்டி தொடரில் பங்கேற்க உள்ளது. இந்தியாவின் தர்மசாலா, லக்னோ மற்றும் கொல்கத்தா ஆகிய நகரங்களில் போட்டிகள் நடைபெற உள்ளன.

முதல் போட்டி வருகிற 12-ந்தேதி தர்மசாலாவில் உள்ள இமாசல பிரதேச கிரிக்கெட் கூட்டமைப்பு ஸ்டேடியத்தில் நடைபெறுகிறது.  2வது போட்டி 15ந்தேதி லக்னோவில் உள்ள ஏ.பி. வாஜ்பாய் ஏகனா கிரிக்கெட் ஸ்டேடியத்திலும், 3வது  போட்டி கொல்கத்தா நகரில் உள்ள ஈடன் கார்டன்ஸ் ஸ்டேடியத்திலும் நடைபெற உள்ளன.

இந்த தொடருக்கான இந்திய அணி நேற்று புதிய தேர்வு குழு தலைவர் சுனில் ஜோஷி தலைமையில் தேர்வு செய்து அறிவிக்கப்பட்டது. முதுகில் ஏற்பட்ட காயத்துக்கு ஆபரேஷன் செய்து ஓய்வில் இருந்த ஆல்-ரவுண்டர் ஹர்திக் பாண்ட்யா, மும்பையில் நடந்த உள்ளூர் 20 ஓவர் கிரிக்கெட்டில் அதிரடி ரன்வேட்டையோடு தனது உடல்தகுதியை நிரூபித்தார். எதிர்பார்த்தது போலவே அவர் அணிக்கு மீண்டும் தேர்வாகியுள்ளார். 26 வயதான பாண்ட்யா கடந்த செப்டம்பர் மாதத்திற்கு பிறகு எந்த சர்வதேச போட்டியிலும் ஆடவில்லை என்பது குறிப்பிடத்தக்கது.

தோள்பட்டை காயத்தால் அவதிப்பட்ட ஷிகர் தவான், குடலிறக்க பிரச்சினைக்கு ஆபரேஷன் செய்த வேகப்பந்து வீச்சாளர் புவனேஷ்வர்குமார் ஆகியோரும் உடல்தகுதியை எட்டி விட்டதால் அணிக்கு திரும்பியுள்ளனர். அதே சமயம் நியூசிலாந்து தொடரின் போது பின்னங்காலில் தசைப்பிடிப்பில் சிக்கிய துணை கேப்டன் ரோகித் சர்மா இன்னும் முழுமையாக குணமடையாததால் அவரது பெயர் பரிசீலிக்கப்படவில்லை.

இந்த மாதத்தில் 35-வது வயதை எட்டும் கேதர் ஜாதவ், மயங்க் அகர்வால், ஷர்துல் தாகூர், ஷிவம் துபே கழற்றி விடப்பட்டனர். இளம் வீரர்கள் பிரித்வி ஷா, சுப்மான் கில் ஆகியோருக்கு தொடர்ந்து வாய்ப்பு அளிக்கப்பட்டுள்ளது. வேகப்பந்து வீச்சாளர் முகமது ஷமிக்கு ஓய்வு கொடுக்கப்பட்டுள்ளது.

தென்ஆப்பிரிக்காவுக்கு எதிரான ஒரு நாள் கிரிக்கெட் தொடருக்கான இந்திய அணிக்கு ஹர்திக் பாண்ட்யா, தவான் திரும்பியுள்ளனர்.

இந்நிலையில் தென் ஆப்பிரிக்கா அணிக்கு எதிராக 3 ஒருநாள் கிரிக்கெட் போட்டிகளில் விளையாடும் இந்திய அணி அறிவிக்கப்பட்டுள்ளது. விராட் கோலி தலைமையிலான இந்திய அணியில் ஷிகர் தவான், ப்ரித்விஷா, ராகுல், மணீஷ் பாண்டே, ஸ்ரேயஸ் ஐயர், ரிஷப் பந்த், ஹர்திக் பாண்டியா  ரவீந்திர ஜடேஜா, புவனேஸ்வர், சாஹல், பும்ரா, நவ்தீப் சைனி, குல்தீப் யாதவ், சுப்மான் கில் ஆகியோர் இந்திய அணியில் இடம் பெற்றுள்ளனர்.