சம்பவம் செய்த ராஜஸ்தான் பௌலர்கள்…கொல்கத்தா அணி படுதோல்வி!

#indcricketnews

நேற்றைய ஐபிஎல் போட்டியில் கொல்கத்தா நைட் ரைடர்ஸ் அணியும் ராஜஸ்தான் ராயல்ஸ் அணியும் மும்பை வான்கடே மோதின. இதில் டாஸ் வென்ற ராஜஸ்தான் அணி கேப்டன் சஞ்சு சாம்சன் பந்துவீச்சைத் தேர்வுசெய்தார். இதன்படி, கொல்கத்தா அணியின் துவக்க ஆட்டக்காரர்களாக நிதிஷ் ராணாவும், ஷுப்மன் கில்லு களமிறங்கினர். இருவரும் நிதானமான ஆட்டத்தை வெளிப்படுத்திய நிலையில், ஆட்டத்தின் 6ஆவது ஓவரில் ஷுப்மன் கில் எதிர்பாராத விதமாக 11 ரன்களுக்கு அவுட் ஆனார்.

மூன்றாவது வீரராகக் களமிறங்கிய ராகுல் திரிபாதி தாக்குப்பிடித்து விளையாடினார். சிறிது நேரத்திலேயே நிதிஷ் ராணாவும் 22 ரன்களுக்கு வெளியேற கொல்கத்தா அணிக்கு நெருக்கடி ஏற்பட்டது. கேப்டன் மோர்கன் தனக்குப் பதிலாக சுனில் நரைனை பேட்டிங் செய்ய அனுப்பி வைத்தார். ஆனால் இந்த முடிவு தோல்வியிலேயே முடிந்தது. சுனில் நரைன் 6 ரன் மட்டுமே எடுத்து அவுட் ஆகி வெளியேறினார். அடுத்து வந்த கேப்டன் மோர்கனும் ஒரு பந்தைக் கூட சந்திக்காமல் ரன் அவுட் ஆகி பெவிலியன் திரும்பினார். கொல்கத்தா அணி 10.2 ஓவர்களில் 4 விக்கெட்களை இழந்து தத்தளித்தது.

தினேஷ் கார்த்திக் 25 ரன்களுக்கு வெளியேற, மிகவும் எதிர்பார்க்கப்பட்ட ஆந்த்ரே 9 ரன்களுக்கும், பேட் கம்மின்ஸ் 10 ரன்களுக்கும் ஆட்டமிழந்து வெளியேறி ஏமாற்றினர். இறுதியில் கொல்கத்தா அணி 20 ஓவர்கள் முடிவில் 9 விக்கெட் இழப்புக்கு 133 ரன்கள் மட்டுமே எடுத்தது. ராஜஸ்தான் தரப்பில் சிறப்பாகப் பந்துவீசிய கிறிஸ் மோரிஸ் 4 விக்கெட் வீழ்த்தினார். ஜெய்தேவ் உனாட்கட், சேட்டன் சகாரியா, முஸ்தாபிசூர் ரஹ்மான் தலா 1 விக்கெட் வீழ்த்தினர்.

இலக்கை துரத்தி களமிறங்கிய ராஜஸ்தான் அணியில் ஜோஸ் பட்லர், யாஷஸ்வி ஜெய்ஸ்வால் இருவரும் ஓபனர்களாக இருந்தனர். பட்லர் 5 ரன்கள் சேர்த்து ஆட்டமிழந்தார். அடுத்து ஜெய்ஸ்வால் 22 (17) ரன்கள் சேர்த்து பெவிலியன் திரும்பினார்.

இந்நிலையில் அடுத்துக் களமிறங்கிய கேப்டன் சஞ்சு சாம்சன் நிதானமாக விளையாடி 41 பந்துகளில் 42 ரன்கள் சேர்த்து அணியை வெற்றிப்பாதை நோக்கி அழைத்துச் சென்றார். ஷிவம் துபே (22), டேவிட் மில்லர் (24*) இருவரும் சிறப்பான பங்களிப்பை வழங்கினர். இதனால், ராஜஸ்தான் அணி 18.5 ஓவர்கள் முடிவில் 134/4 ரன்கள் அடித்து அபார வெற்றியைப் பெற்றது.

கொல்கத்தா அணி பந்துவீச்சாளர்கள் வருண் சக்ரவர்த்தி இரண்டு விக்கெட்களை கைப்பற்றி அசத்தினார். ஷிவம் மாவி, பிரசித் கிருஷ்ணா இருவரும் தலா ஒரு விக்கெட்டை வீழ்த்தினார்கள்.

Be the first to comment on "சம்பவம் செய்த ராஜஸ்தான் பௌலர்கள்…கொல்கத்தா அணி படுதோல்வி!"

Leave a comment

Your email address will not be published.