கொல்கத்தா ரசிகர்களை ஏமாற்றிய ரஸல்… மும்பை இந்தியன்ஸ் அபார வெற்றி!!

ஐபிஎல் 13ஆவது சீசனில் இதுவரை நடைபெற்ற போட்டிகளில் டாஸ் வென்ற அனைத்து அணிகளும் முதலில் பீல்டிங் தேர்வு செய்த நிலையில், கொல்கத்தா அணியும் மும்பை அணிக்கு எதிரான இன்றைய ஆட்டத்தில் பீல்டிங்கை தேர்வு செய்தது.

மும்பை இந்தியன்ஸ் தொடக்க வீரர் குவின்டன் டி காக் ஒரு ரன் எடுத்து ஆட்டமிழந்தார். அடுத்து களமிறங்கிய சூர்ய குமார் யாதவுடன், ரோஹித் ஷர்மா பார்ட்னர்ஷிப் அமைத்து பௌலர்களை தெறிக்கவிட்டனர். மூன்றாவது ஓவரில் மட்டும் 4 பவுண்டரிகளை பறக்கவிட்டார் சூர்யகுமார் யாதவ். அதன்பின்பு, ஆட்டம் சூடு பிடிக்கத் தொடங்கியது.

சிக்ஸர், பவுண்டரிகள் காற்றில் பறந்த நிலையில், சூர்ய குமார் யாதவ் 28 பந்துகளில் 47 ரன்கள் குவித்து, சுனில் நரேன் வீசிய 11 ஓவரில் ரன் அவுட் ஆகி பெவிலியன் திரும்பினார்.

மறுபுறம் ரோஹித் ஷர்மா எந்த தயக்கமும் இல்லாமல் பந்துகளை அடித்து ஆடினார். சௌரவ் திவாரி ஓரளவுக்கு தாக்குப்பிடித்து 23 ரன்கள் சேர்த்து நரேனிடம் வீழ்ந்தார்.

தொடர்ந்து அதிரடியாக விளையாடிய ரோஹித் ஷர்மா 54 பந்துகளில் 6 சிக்ஸர், 3 பவுண்டரிகளுடன் 80 ரன்கள் சேர்த்து, இளம் பந்து வீச்சாளர் ஷிவம் மாவியிடம் வீழ்ந்தார். அடுத்துக் களமிறங்கியவர்கள் சரியாக சோபிக்காத காரணத்தால் மும்பை இந்தியன்ஸ் 5 விக்கெட் இழப்பிற்கு 190 ரன்கள் எடுத்தது. கொல்கத்தா அணியின் இளம் வேகப்பந்து வீச்சாளர் ஷிவம் மவி 2 விக்கெட்களை கைப்பற்றினார்.

191 ரன்கள் எடுத்தால் வெற்றி என்ற கடின இலக்கை நோக்கிப் பயணித்த கொல்கத்தா அணி தொடக்கத்தில் தாறுமாறாகச் சறுக்கியது. சுப்மன் கில், நரேன் ஒற்றை இலக்க ரன்கள் எடுத்து வெளியேறினர். அடுத்துக் களமிறங்கிய தினேஷ் கார்த்திக், நிதிஷ் ராணா பொறுமையாக ரன்கள் சேர்த்ததால் ஸ்கோர் மந்தமானது. தினேஷ் கார்த்திக் 30 ரன்களும், நிதிஷ் ராணா 24 ரன்களும் எடுத்து பெவிலியன் திரும்பினர்.

பெரிதும் எதிர்பார்க்கப்பட்ட இயான் மோகன், ரஸல் பார்ட்னர்ஷிப் மாயாஜாலத்தை நிகழ்த்தத் தவறி பும்ராவிடம் வீழ்ந்தது. 30 பந்துகளுக்கு 96 ரன்கள் குவிக்க வேண்டும் என்ற நிலையில், ரஸல் 11 பந்துகளில் 11 ரன்களும், மோர்கன் 16 ரன்களும் எடுத்து நடையைக் கட்டினர்.

பேட் கம்மின்ஸ், பும்ரா வீசிய 18ஆவது ஓவரில் 4 சிக்ஸர்களை பறக்கவிட்டார். கடைசியில் அவரும் 33 ரன்களுக்கு ஆட்டமிழந்தார். மற்ற வீரர்கள் அனைவரும் சொற்ப ரன்களுக்கு ஆட்டமிழக்க, கொல்கத்தா அணி 8 விக்கெட் இழப்பிற்கு 146 ரன்கள் எடுத்து 49 ரன்கள் வித்தியாசத்தில் தோல்வியைத் தழுவியது.

Be the first to comment on "கொல்கத்தா ரசிகர்களை ஏமாற்றிய ரஸல்… மும்பை இந்தியன்ஸ் அபார வெற்றி!!"

Leave a comment

Your email address will not be published.


*