கொரோனாவை வீழ்த்தி பயிற்சிக்குத் திரும்பிய தீபக் சாஹர் !

சென்னை சூப்பர் கிங்க்ஸ் வீரர் தீபக் சாஹர் கொரோனாவிலிருந்து மீண்டு பயிற்சி மேற்கொண்டுவருகிறார்.

கொரோனாவால் பாதிக்கப்பட்டு மீண்டுள்ள சென்னை அணி வீரர்கள் தீபக் சாஹர் தற்போது பயிற்சி களத்திற்குத் திரும்பியுள்ளதாக அணியின் தலைமை நிர்வாகி காசி விஸ்வநாதன் தெரிவித்துள்ளார்.

இதுகுறித்து தனியார் பத்திரிக்கை ஒன்றுக்குப் பேட்டியளித்த அவர், “கொரோனாவால் பாதிக்கப்பட்ட வேகப்பந்து வீச்சாளர் தீபக் சாஹர் தற்போது குணமடைந்துள்ளார். 14 நாட்கள் தனிமைப்படுத்தப்பட்ட பின்பு இரண்டுமுறை கொரோனா பரிசோதனை நடத்தப்பட்டது. தொற்று உறுதியாகாததால் மற்ற வீரர்களுடன் இணைந்து பயிற்சியில் ஈடுபடத் தொடங்கியுள்ளார்” என்று தெரிவித்தார்.

சென்னை அணியில் மொத்தம் இரண்டு வீரர்களுக்கு கொரோனா பாதிப்பு உறுதி செய்யப்பட்டது. தீப்க சாஹர் தற்போது களத்திற்குத் திரும்பிவிட்டார். ருதுராஜின் நிலைமை எப்படி இருக்கிறது. அவர் கொரோனாவில் இருந்து குணமடையவில்லையா என்று கேள்விகள் எழுப்பப்பட்டது. இதற்குப் பதிலளித்த அவர், ருதுராஜ் இன்னும் சில நாட்களுக்குத் தனிமை முகாமில் இருப்பார் என்று கூறினார்.

“ருதுராஜ் கொரோனாவில் இருந்து குணமடையவில்லை என்று வதந்தி பரவி வருகிறது. அவர் குணமடைந்துவிட்டார். கொரோனாவிற்கான அறிகுறிகள் எதுவும் தென்படவில்லை. மருத்துவர்களின் பரிந்துரையின் அடிப்படையில், அவர் இன்னும் சில காலம் தனிமை முகாமில் இருப்பார்” என்று தெரிவித்தார்.

தீபக் சாஹர் உற்சாகமாக பயிற்சியில் ஈடுபட்டு வரும் வீடியோ ஒன்றைச் சென்னை சூப்பர் கிங்ஸ் அணி நிர்வாகம் இணையத்தில் பதிவேற்றம் செய்துள்ளது.

சென்னை அணியில் இரண்டு வீரர்கள் உட்பட மொத்தம் 13 பேருக்கு தொற்று உறுதியானது. இதனால், செப்டம்பர் 1ஆம் தேதி தொடங்கவிருந்த பயிற்சி ரத்தானது. அதன்பின்பு, வீரர்கள் அனைவருக்கும் இரண்டுமுறை கொரோனா பரிசோதனை நடத்தப்பட்டது. அதில் யாருக்கும் தொற்று உறுதியாகாததால், வீரர்களை தவிர்த்து மற்ற வீரர்கள் செப்டம்பர் 4ஆம் தேதி முதல் பயிற்சியில் ஈடுபட்டு வருகிறார்கள்.

தீபக் சகார், ருதுராஜ் ஆகியோர் 14 நாட்கள் தனிமைப்படுத்தப்பட்டனர். தீபக் சாஹருக்கு இருமுறை தொற்றுக்கான பரிசோதனை நடத்தப்பட்டது. அதில், அவர் முழுமையாகக் குணமடைந்தது தெரியவந்ததை அடுத்து தற்போது பயிற்சிக்கு திரும்பியுள்ளார்.

ருதுராஜ் கெய்க்வாட்டிற்கான தனிமை முகாம் செப்டம்பர் 12ஆம் தேதி முடிவடைகிறது. அவர் குணமடைந்து நலமுடன் இருப்பதாகத் தகவல் வெளியாகியுள்ளது. மீண்டும் அவர் எப்போது அணியில் இணைவார் என்பதை மருத்துவர்கள் முடிவு செய்வார்கள் என்று கூறப்படுகிறது.

செப்டம்பர் 19-ல் தொடங்க உள்ள முதல் லீக் போட்டியில் சென்னை அணி, நடப்பு சாம்பியன் மும்பை இந்தியன்ஸ் அணியை எதிர்கொண்டு விளையாட உள்ளது. இரவு 7:30 மணிக்குத் தொடங்கும் போட்டியானது அபுதாபியில் நடைபெறவுள்ளது குறிப்பிடத்தக்கது.

Be the first to comment on "கொரோனாவை வீழ்த்தி பயிற்சிக்குத் திரும்பிய தீபக் சாஹர் !"

Leave a comment

Your email address will not be published.


*