ஐபிஎல்: பென் ஸ்டோக்ஸ் சந்தேகம்… சிக்கலில் ராஜஸ்தான் அணி!

இந்த ஆண்டு ஐபிஎல் தொடரிலிருந்து ஹர்பஜன் சிங், லசித் மலிங்கா போன்ற வீரர்கள் விலகிய நிலையில், இங்கிலாந்து வீரர் பென் ஸ்டோக்ஸ் விளையாடுவதிலும் சிக்கல் ஏற்பட்டுள்ளது.

கடந்த மாதம் நடைபெற்ற பாகிஸ்தானுக்கு எதிரான டெஸ்ட் தொடரில் பென் ஸ்டோக்ஸ் பங்கேற்று விளையாடிக் கொண்டிருந்தார். நியூசிலாந்தில், புற்று நோயால் பாதிக்கப்பட்ட அவரது தந்தையின் உடல்நிலை கவலைக்கிடமாக இருந்ததால், ஸ்டோக்ஸ் உடனடியாக அந்தத் தொடரிலிருந்து விலகி நியூசிலாந்திற்கு விரைந்தார். தற்போது வரை அவருடைய தந்தையின் உடல்நிலை கவலைக்கிடமான நிலையில் இருப்பதால் ஸ்டோக்ஸ் ஐபிஎல் தொடரில் பங்கேற்கதுபாய் செல்வதற்கான வாய்ப்பு குறைவு என்று கூறப்படுகிறது.

இது தொடர்பாக ராஜஸ்தான் ராயல்ஸ் அணி உரிமையாளர் கூறுகையில், “உடல்நலம் பாதிக்கப்பட்ட தந்தையைக் காண பென் ஸ்டோக்ஸ் நியூசிலாந்து சென்றுள்ளார். அவரிடம் நாங்கள் பேசினோம். தந்தையுடனும், குடும்பத்துடனும் நேரம் செலவிட விரும்புவதாக அவர் கூறினார்” என்று தெரிவித்துள்ளார். பென் ஸ்டோக்ஸ் ராஜஸ்தான் அணியில் விளையாடுவதற்கு ரூ.12.5 கோடிக்கு ஏலம் போனார் என்பது குறிப்பிடத்தக்கது.

“பென் ஸடோக்ஸ் தற்போது இருக்கும் நிலைமையில், முதல் சில போட்டிகளில் அவரால் பங்கேற்க இயலாது. மீதமுள்ள போட்டிகளில் அவர் பங்கேற்பாரா என்று எங்களால் தெளிவாகக் கூறமுடியாது. அவரின் விருப்பப்படி குடும்பத்தினருடனும், தந்தையுடனும் நேரத்தைச் செலவிடட்டும். அவர் துபாய் வர விரும்பினால், எப்போது வேண்டுமானாலும் வரலாம்” என்று ராஜஸ்தான் ராயல் அணி உரிமையாளர் கூறியுள்ளார்.

கொரோனா காரணமாக ஐக்கிய அரபு அமீரகத்திற்கு மாற்றப்பட்டுள்ள ஐபிஎல் தொடர் செப்டம்பர் 19ஆம் தேதி தொடங்கி நவம்பர் 10 வரை நடைபெறவுள்ளது. ஐபிஎல் தொடரின் முதல் பாதியில் பென் ஸ்டோக்ஸ் கலந்து கொள்ளமாட்டார் என்று கூறியுள்ள ராஜஸ்தான் அணி, அவர் இரண்டாவது பாதியில் பங்கேற்க வாய்ப்பிருக்கிறதா என்று ஆலோசித்து வருவதாகக் கூறப்பட்டுள்ளது.

2019ஆம் ஆண்டு இங்கிலாந்து அணி உலகக் கோப்பை வெல்வதற்கு முக்கிய காரணமாக இருந்த பென் ஸ்டோக்ஸ், இதுவரை 67 டெஸ்ட், 95 ஒருநாள் மற்றும் 26 டி20 போட்டிகளில் பங்கேற்றுள்ளார்.

நியூசிலாந்து சென்றபின்பு, உள்ளூர் பத்திரிக்கை ஒன்றுக்குப் பேட்டியளித்த பென் ஸ்டோக்ஸ், “எனது தந்தையின் உடல்நிலை மோசமாக உள்ளது. பல இரவுகளில் நான் தூங்கவில்லை. என்னுடைய தலையே வெடித்துவிடும் போல் இருக்கிறது. ஐபிஎல் தொடரில் இருந்து விலகுவதே சரியாக இருக்கும் என்று தீர்மானித்துள்ளேன்” என்று தெரிவித்திருந்தார்.

ஏற்கெனவே ஹர்பஜன் சிங், லசித் மலிங்கா போன்ற வீரர்கள் தொடரிலிருந்து விலகியுள்ள நிலையில் தற்போது பென் ஸ்டோக்ஸ் பங்கேற்பதும் சந்தேகத்தில் உள்ளது. இது ராஜஸ்தான் அணிக்கு பெரும் பின்னடைவை ஏற்படுத்தியுள்ளது.

Be the first to comment on "ஐபிஎல்: பென் ஸ்டோக்ஸ் சந்தேகம்… சிக்கலில் ராஜஸ்தான் அணி!"

Leave a comment

Your email address will not be published.


*