இந்திய அணிக்கு ரோஹித் ஷர்மா கேப்டன்: கம்பீர் நெத்தியடி!

ஐபிஎல் தொடரில் ஐந்து முறை மும்பை இந்தியன்ஸ் அணிக்கு கோப்பை வென்றுகொடுத்த கேப்டன் ரோஹித் ஷர்மாவை, இந்திய அணியின் ஒருநாள், டி20 அணிகளுக்கு கேப்டனாக நியமிக்க வேண்டும் என முன்னாள் கிரிக்கெட் வீரர் கவுதம் கம்பீர் கோரிக்கை வைத்துள்ளார்.

ஐபிஎல் 13ஆவது சீசன் இறுதிப் போட்டியில் டெல்லி கேபிடல்ஸ் அணியை வீழ்த்தி மும்பை இந்தியன்ஸ் கோப்பை வென்றது. இதற்கு முன் 2013, 2015, 2017 மற்றும் 2019 ஆகிய ஆண்டுகளில் ரோஹித் ஷர்மா தலைமையில் கோப்பை வென்ற மும்பை இந்தியன்ஸ் தற்போது 5ஆவது முறையாகக் கோப்பையைத் தட்டித் தூக்கியுள்ளது

ரோஹித் ஷர்மாவின் அபாரமான கேப்டன்ஸி காரணமாகத்தான் மும்பை அணி ஐந்துமுறை கோப்பை வென்றுள்ளதாகப்ப் பலர் கூறிவரும் நிலையில் கவுதம் கம்பீரும் இதைக் குறிப்பிட்டு, இந்திய அணியின் ஒருநாள், டி20 அணிக்கு ரோஹித் ஷர்மாவை கேப்டனாக நியமிக்க வேண்டும் எனக் கோரிக்கை வைத்துள்ளார்.

தனியார் தொலைக்காட்சிக்கு பேட்டியளித்த அவர், “ரோஹித் ஷர்மா இந்திய அணிக்கு கேப்டனாக பொறுப்பேற்கவில்லை என்றால் இந்திய அணிக்குத்தான் நஷ்டம். அவருக்கு ஒரு நஷ்டமும் ஏற்படப்போவதில்லை. கேப்டன் சரியாக இருந்தால்தான் அணி வலுவாக இருக்கும். கேப்டனாக பொறுப்பேற்பதற்கு அளவுகோல் உள்ளது. ரோஹித் ஷர்மா ஐந்து முறை ஐபிஎல் கோப்பை வென்றுகொடுத்துள்ளார். இதற்குமேல், ரோஹித்திடம் எதை எதிர்பார்க்க வேண்டும்?” எனக் கேள்வி எழுப்பியுள்ளார்.

விராட் கோலி, ராயல் சேலஞ்சர்ஸ் பெங்களூர் அணியை 8 வருடங்களாக வழி நடத்தி வருகிறார். இருப்பினும், ஒருமுறை கூட அணிக்குக் கோப்பை வென்று கொடுத்ததில்லை. ரோஹித் ஷர்மாவுக்கும், விராட் கோலிக்கும் இதுதான் வித்தியாசம் என கம்பீர் கூறினார். மேலும் பேசிய அவர், விராட் கோலி திறமையற்றவர் கிடையாது. அப்படி நான் சொல்ல மாட்டேன். அவர் டெஸ்ட் போட்டிகளில் இந்திய அணியைச் சிறப்பாக வழிநடத்தி வருகிறார் எனக் கூறினார்.

“இந்திய அணியில் கேப்டன் பதவியைப் பிரித்துக்கொள்ள வேண்டும். ஒருநாள், டி20 அணிகளுக்கு ரோஹித் ஷர்மாவை கேப்டனாக நியமிக்க வேண்டும். விராட் கோலி டெஸ்ட் அணியைச் சிறப்பாக வழிநடத்தி வருகிறார். இதனால், அதில் மாற்றங்கள் செய்யத் தேவையில்லை. விராட் கோலி திறமையற்றவர் கிடையாது. அதேவேளையில், ரோஹித் ஷர்மாவை நாம் குறைத்து மதிப்பிடக் கூடாது” எனத் தெரிவித்தார்.

“நான் ரோஹித் ஷர்மாவுக்கு ஆதரவாகவும், விராட் கோலிக்கு எதிராகவும் பேசுவதுபோல் நீங்கள் நினைக்கலாம். அதைப்பற்றி நான் கவலைப்படப்போவதில்லை. ஐபிஎல் தொடரில் இருவரின் கேப்டன்ஸி குறித்து நீங்களை ஆராய்ந்து பார்த்து யார் சிறந்தவர் என்பதை முடிவு செய்துகொள்ளுங்கள்” எனப் பேசினார்.

Be the first to comment on "இந்திய அணிக்கு ரோஹித் ஷர்மா கேப்டன்: கம்பீர் நெத்தியடி!"

Leave a comment

Your email address will not be published.