அதுக்கு நீ சரிபட்டு வரமாட்ட: பும்ராவுக்கு தோனி கொடுத்த அட்வைஸ்!

டி20, டெஸ்ட், ஒருநாள் என மூன்று விதமான கிரிக்கெட் போட்டிகளிலும் மிரட்டல் பந்து வீச்சை வெளிப்படுத்தி வரும் ஜஸ்பரித் பும்ரா தோனி குறித்துப் சில புதிய தகவல்களை டைம்ஸ் ஆஃப் இந்தியா பத்திரிக்கைக்குப் பகிர்ந்துள்ளார். 2016ஆம் ஆண்டு ஆஸ்திரேலிய அணிக்கு எதிரான ஒருநாள் போட்டியில் பும்ரா அறிமுகமானபோது அப்போது கேப்டனாக இருந்த தோனி, தனது யார்க்கர் பந்துவீச்சை எந்தளவுக்கு மதிப்பீடு செய்து வைத்திருந்தார் என்பதை விரிவாகக் கூறியுள்ளார்.

பும்ரா கூறுகையில், “தோனியின் தலைமையில் ஆஸ்திரேலியாவுக்கு எதிரான ஒருநாள் போட்டியில் அறிமுகமானேன். புதுமுக வீரர் என்பதால் தன்னம்பிக்கை அளிக்கும் வகையில் என்னிடம் நிறையப் பேசினார். அதற்குமுன் தோனி என்னுடைய பந்துவீச்சைப் பார்த்ததில்லை என்பது இங்கு நிறையப் பேருக்குத் தெரியாது. டெத் ஓவர்களை வீச எனக்கு வாய்ப்பு கிடைத்தது. தோனியிடம் சென்று நான் யார்க்கர் வீசட்டுமா என்று கேட்டேன். அதெல்லாம் வேண்டாம் என்று அவர் கூறிவிட்டார். என்னால் யார்க்கர் பந்தை துல்லியமாக வீசமுடியாது என்று அவர் நினைத்திருக்கலாம்” என்று தெரிவித்தார்.

இருப்பினும் அப்போட்டியில் 49ஆவது ஓவரில் துல்லியமாக யார்க்கர் வீசியதால் வெறும் மூன்று ரன்கள் மட்டுமே ஆஸ்திரேலியாவால் எடுக்க முடிந்தது. பும்ரா தனது அறிமுகப் போட்டியில் 2 விக்கெட்களை வீழ்த்தி 40 ரன்கள் விட்டுக்கொடுத்தார். போட்டி முடிந்த பின்பு தோனி தன்னிடம் வந்து, நீ மட்டும் தொடரின் ஆரம்பத்தில் இருந்து விளையாடியிருந்தால் நாம் நிச்சயம் தொடரை வென்றிருப்போம் என்று கூறியதாக பும்ரா தெரிவித்தார்.

“போட்டி முடிந்த பிறகு தோனி என்னிடம் வந்தார். டெத் ஓவர்களில் என்ன செய்வது என்று தெரியவில்லை. அதனால்தான் யார்க்கர் முயற்சித்தேன் என்று அவரிடம் கூறினேன். நீ மட்டும் ஆரம்பத்திலிருந்து பங்கேற்றிருந்தால் நாம் நிச்சயம் தொடரைக் கைப்பற்றியிருப்போம். என்று என்னிடம் கூறினார்” என கூல் கேப்டன் பற்றி சில தகவல்களை பகிர்ந்துகொண்டார் பும்ரா.

அப்போட்டியில் ஆஸ்திரேலிய அணி முதலில் களமிறங்கி 330 ரன்கள் குவித்தது. டேவிட் வார்னர் 122 ரன்கள் எடுத்தார். கடின இலக்கைத் துரத்திக் கொண்டு சென்ற இந்திய அணி அபார வெற்றிபெற்றது. ரோஹித் ஷர்மா 99 ரன்கள், ஷிகர் தவன் 78 ரன்கள் மற்றும் மணிஷ் பாண்டே 102 எடுத்து வெற்றிக்கு வழிவகுத்தனர்.

மகேந்திரசிங் தோனி தலைமையிலான சென்னை அணியும், பும்ரா இடம்பெற்றுள்ள மும்பை இந்தியன்ஸ் அணியும் செப்டம்பர் 19ஆம் தேதி நடைபெறவுள்ள ஐபிஎல் முதல் லீக் போட்டியில் நேருக்கு நேர் மோத உள்ளன. அபுதாபியில் நடைபெறும் இப்போட்டி இரவு 7:30 மணிக்குத் தொடங்குகிறது.

Be the first to comment on "அதுக்கு நீ சரிபட்டு வரமாட்ட: பும்ராவுக்கு தோனி கொடுத்த அட்வைஸ்!"

Leave a comment

Your email address will not be published.


*