அடுத்த தோனி நான்தான்… ஒரு கை பாத்துருவோம்ல… ரஹானே அதிரடி!

ஐபிஎல் தொடரில் டெல்லி அணிக்கு இடம்மாறியுள்ள அஜிங்க்ய ரஹானே, ஓபனிங் இறங்குவதற்கு வாய்ப்புகள் குறைவு என்று கூறப்படுகிறது. இதுபற்றி அவரின் கேட்டபோது, 5, 6ஆவது வரிசையில் களமிறங்கினாலும் தோனி போன்று பெஸ்ட் ஃப்னிஷ்சராக தன்னால் மாறமுடியும் என்று அதிரடியாகத் தெரிவித்துள்ளார்.

டெல்லி கேப்பிடல்ஸ் அணியில் முதல் வரிசை பேட்ஸ்மேன்களுக்கான இடங்களுக்கு பலத்த போட்டி நிலவுகிறது. தொடக்க ஆட்டக்காரர்களாக ஷிகார் தவான், பிரித்வி ஷா இருக்கிறார்கள். அடுத்தடுத்த நிலைகளில் ஸ்ரேயாஸ் ஐயர், ஷிம்ரான் ஹெட்மியர் மற்றும் ரிஷப் பந்த் உள்ளனர்.

இதனால், புதிதாக அணியில் இணைந்திருக்கும் அஜிங்க்ய ரஹானேவுக்கு முதல் வரிசையில் இடமிருக்காது என்று கூறப்படுகிறது. பயிற்சியாளராக இருக்கக்கூடிய ரிக்கி பாண்டிங் இப்பிரச்சனையை எப்படித் தீர்ப்பார் என்று அனைவரும் எதிர்பார்த்து கொண்டிருந்த நிலையில், இணைய வழியில் பத்திரிக்கையாளர்களைச் சந்தித்த ரஹானே இதுதொடர்பாக விளக்கம் கொடுத்துள்ளார்.

எந்த வரிசையில் களமிறங்க உள்ளீர்கள் என்று எழுப்பப்பட்ட கேள்விக்குப் பதிலளித்த அவர், “இதுபற்றி எனக்கு தெரியாது. நாங்கள் விரைவில் பயிற்சியைத் தொடங்க உள்ளோம். அதன்பின்பு இதில் இறுதி முடிவு எடுக்கப்படும்” என்று கூறினார்.

“நான் கிரிக்கெட் விளையாடத் தொடங்கியதில் இருந்து தற்போது வரை தொடக்க ஆட்டக்காரராக மட்டுமே விளையாடி வருகிறேன். அதைத்தான் தற்போதுவரை விரும்புகிறேன்.

டெல்லி அணியில் எந்த இடத்தில் களமிறக்கப்படுவேன் என்பது பற்றி இன்னும் முடிவாகவில்லை. விரைவில் பயிற்சியைத் தொடங்க உள்ளோம். அதன்பின்பு, பயிற்சியாளர் முடிவு எடுப்பார். நான் எந்த வரிசையில் களம் கண்டாலும் சிறப்பாக விளையாடுவேன்.

ஒருவேளை 5 அல்லது 6 ஆவது வரிசையில் உங்களைக் களமிறக்கினால் என்ன செய்வீர்கள் என்று கேட்கப்பட்ட கேள்விக்கு அவர் அதிரடியாகப் பதிலளித்துள்ளார்.

ஒருவேளை 5, 6ஆவது இடங்களில் களமிறங்கினாலும் சிறப்பான ஆட்டத்தை வெளிப்படுத்துவேன். எந்த வரிசையில் களமிறங்கினாலும் தோனி போன்று பெஸ்ட் ஃப்னிஷ்சராக தன்னால் மாறமுடியும் நீங்கள் கேட்டதுபோல் பயிற்சியாளர் என்னிடம் கேட்டால், நான் சரி என்றே சொல்வேன். எதற்கும் தயார்” என்று ரஹானே அதிரடியாக பதிலளித்துள்ளார்.

மூன்று அல்லது நான்கு வாரங்கள் நடக்க உள்ள பயிற்சி முகாமில் கடுமையாகப் பயிற்சி செய்து உங்களால் பெஸ்ட் ஃப்னிஷராக மாற முடியுமா என்ற கேள்விக்கு, “நீங்கள் என்னுடைய ஸ்ட்ரைக் ரேட்டை மனதில் வைத்து கேள்வி கேட்கிறீர்கள். அந்த விஷயங்களை எல்லாம் நான் பொருட்படுத்துவது கிடையாது. என்னை நம்பி என்ன பொறுப்பு கொடுக்கப்படுகிறதோ அதைச் சிறப்பாக முடித்துக் காட்டுவேன். அதற்கான மனவுறுதி என்னிடம் உள்ளது” என்று அவர் தெரிவித்துள்ளார்.

Be the first to comment on "அடுத்த தோனி நான்தான்… ஒரு கை பாத்துருவோம்ல… ரஹானே அதிரடி!"

Leave a comment

Your email address will not be published.


*